وڭتۇستىكتە 86 مىڭ توننا الما جينالدى

13.10.2017 16:16

 شىمكەنت. قازاقپارات - بيىل وڭتۇستىك قازاقستان وبلىسىنىڭ باعباندارى 86,4 مىڭ توننا الما جينادى، قازاقپارات دەپ حابارلايدى وبلىس اكىمىنىڭ باسپا ءسوز قىزمەتى.

بيىل وڭىردە 654,8 گەكتارعا قارقىندى الما باۋى وتىرعىزىلسا، قارقىندى باۋدىڭ جالپى كولەمى  2800 گەكتارعا جەتىپ وتىر. الما ءوسىرۋ - وڭتۇستىكتە اۋىل شارۋاشىلىعىنىڭ باسىمدى باعىتتارىنىڭ ءبىرى. ءوڭىردىڭ تابيعاتى قولايلى بولعاندىقتان الما وبلىستىڭ كەز كەلگەن اۋدانىندا وسەدى. دەگەنمەن بۇل شارۋاشىلىقپەن اينالىسۋدى تۇلكىباس، قازىعۇرت، تولەبي، سارىعاش، ورداباسى جانە بايدىبەك اۋدانىنىڭ شارۋالارى مىقتاپ قولعا العان. جالپى ايماقتا الما وسىرۋمەن اينالىساتىن 100 گە جۋىق شارۋا قوجالىقتارى بار. سونىڭ ىشىندە «امانگەلدى» ج ش س ەڭ ءىرىسى سانالادى.

 اتالعان سەرىكتەستىك يەلىگىندە بۇگىندە 530 گەكتار الما باۋى بار. ال، «ارسەنال ساد» ج ش س 304 گەكتار جەردە ءوز باۋىن جايقالتىپ وتىر. وڭتۇستىك قازاقستاندا وسىرىلگەن الما جەمىسى نەگىزىنەن قازاقستاننىڭ وزگە وبلىستارىمەن قاتار رەسەي مەن وزبەكستانعا ەكسپورتتالادى. قالىپتى الما باۋدىڭ ءار گەكتارىنان 20-30 توننا ءونىم الىنسا، قارقىندى باۋدان 40-50 تونناعا دەيىن ءونىم جيناۋعا بولادى. سوندىقتان مەملەكەت قارقىندى باۋمەن اينالىسامىن دەگەندەرگە قولداۋ كورسەتۋدە. ماسەلەن، قارقىندى باۋدىڭ ءار گەكتارىنا ساپاسىنا قاراي 1 ميلليوننان 2,8 ميلليون تەڭگەگە دەيىن سۋبسيديا بەرىلەدى. سونداي- اق، وتىرعىزىلعان جەمىستىڭ ءاربىر كوشەتىنە 135 تەڭگە سۋبسيديا قاراستىرىلادى. ال، جاي باۋدان تەك المانىڭ اپورت سۇرپىنا سۋبسيديا بەرىلەدى. ونىڭ دا وزىندىك تالاپتارى بار. مۇنداي باۋ تەڭىز دەگەيىنەن 900 مەتر بيىكتىكتە، سونىمەن قاتار ەگىس كولەمى 5 گەكتاردان كەم بولماۋى ءتيىس. ال ونىڭ ءار گەكتارىنا 549 مىڭ تەڭگەدەن باستاپ سۋبسيديا الۋعا بولادى. بۇگىنگى كۇندە وبلىس بويىنشا جالپى جەمىس- جيدەكتىڭ ەگىس كولەمى 14,4 مىڭ گەكتاردى قۇرايدى. بيىل 108 مىڭ توننا جەمىس (2016 ج - 91,3 مىڭ ت) جينالعان.

پئكئر قالدئرؤ


قازاقپارات