وڭتۇستىكتەن 400 مىڭ توننا باقشا ونىمدەرى بەس ەلگە ەكسپورتتالدى

14.11.2017 21:33

شىمكەنت. قازاقپارات - وڭتۇستىك قازاقستان وبلىسىنىڭ شارۋالارى وسى جىلدىڭ توعىز ايىندا رەسەي، بەلارۋس، قىرعىزستان، لاتۆيا، ليتۆا، ەستونيا جانە گەرمانياعا 225 مىڭ توننادان استام قاۋىن، 148 مىڭ توننا قاربىز، 14 مىڭ تونناعا جۋىق ءجۇزىم، 43 مىڭ توننا شاماسىندا قىرىققابات ەكسپورتتاعان،

  دەپ حابارلايدى قازاقپارات وبلىس اكىمدىگىنىڭ باسپا ءسوز قىزمەتىنە سىلتەمە جاساپ.

 سونىمەن بىرگە، ءوڭىر شارۋالارى كوكونىس پەن باقشادان باسقا بۇل ەلدەرگە ەت، سۋسىندار مەن ءىرى قارا مالعا ارنالعان ازىق پەن بالىق كونسەرۆىلەرىن شىعارىپ كەلەدى. سوڭعى ۋاقىتتا وبلىستا قارقىندى باۋ باقشا شارۋاشىلىعىن دامىتۋ جانە جاڭا تەحنولوگيالاردى قولدانۋدىڭ ارقاسىندا باقشا ونىمدەرىنىڭ كولەمى ارتتى. وسىنىڭ ناتيجەسىندە، جەمىس يمپورتىنىڭ ۇلەسى 99,3 ميلليون دوللارعا نەمەسە 33,3 پايىزعا، ال كوكونىس 6,2 ميلليون دوللارعا نەمەسە 4,8 تومەندەگەن.



جالپى وڭتۇستىك قازاقستاندا 21 كاسىپورىن ءوز ونىمدەرىن شەت ەل اسىرىپ، ەكسپورتتايدى. ايماقتىڭ كاسىپكەرلەرى وزبەكستان، قىرعىزستان، اۋعانستان جانە تاجىكستانعا وسىمدىك مايى مەن ۇن، بالىق سۇبەسى مەن كونسەرۆىلەنگەن بالىق، قۇس جۇمىرتقاسىن، ماكارون، كونديتەرلىك ونىمدەردى، قوي ەتىن جانە سيىر ەتىن شەت ەل نارىعىنا ساۋدالاۋدا.

اگرارلى ايماقتىڭ شارۋالارى كوكونىسپەن قاتار ءداندى داقىلداردى دا ەكسپورتتاۋعا ەرەكشە باسىمدىق بەرىپ كەلەدى. ماسەلەن، جىل باسىنان بەرى شەت مەملەكەتتەرگە قۇنى 17,6 ميلليون دوللاردى قۇرايتىن بيداي مەن 49,3 ميلليون دوللارعا ۇن ونىمدەرى ەكسپورتتالعان. جالپى اۋىل شارۋاشىلىعى ەكسپورتىنىڭ كولەمى بۇگىنگى تاڭدا 211,4 ميلليون ا ق ش دوللارىن قۇراپ، وتكەن جىلمەن سالىستىرعاندا 6 پايىزعا وسكەن. ال يمپورت كولەمى 320 ميلليون ا ق ش دوللارىن قۇراپ، 4 پايىزعا كەمىگەن. بيىل وڭتۇستىك قازاقستان وبلىسىنىڭ ديقاندارى 376,5 ميلليارد تەڭگەنى قۇرايتىن اۋىل شارۋاشىلىعى ءونىمىن ءوندىردى. بۇل وتكەن جىلعىمەن سالىستىرعاندا 57 ميلليارد تەڭگەگە كوپ. ياعني، ديقاندار بيىل 400 مىڭ تونناعا جۋىق استىقتى قامباعا قۇيسا، 116 مىڭ توننا جەمىس- جيدەك پەن 919 مىڭ توننا كوكونىس، 295 مىڭ توننا كارتوپ، 1,3 ميلليون توننا باقشا داقىلدارىن جينادى.

پئكئر قالدئرؤ


قازاقپارات