قاسىم-جومارت توقايەۆ: قازاقستان سپورتتىق دەرجاۆا رەتىندە الەمگە تانىلدى

07.12.2017 21:18

استانا. قازاقپارات - استانادا وتەتىن گراند فينال ءتۋرنيرى قارساڭىندا ق ر پارلامەنت سەناتىنىڭ ءتوراعاسى، ۇستەل تەننيسى فەدەراتسياسىنىڭ پرەزيدەنتى قاسىم-جومارت توقايەۆ «قازاقپارات» ح ا ا تىلشىسىنە نەلىكتەن الەمدىك دارەجەدەگى سايىس ت م د مەملەكەتتەرىنىڭ ىشىندە ءبىرىنشى بولىپ قازاقستاندا وتكىزىلگەلى جاتقانىن ايتىپ بەردى، دەپ حابارلايدى «قازاقپارات» ح ا ا ءتىلشىسى.

- قاسىم-جومارت كەمەل ۇلى، الدا ۇستەل تەننيسىنەن استانادا وتەتىن الەمدىك دەڭگەيدەگى گراند فينال سايىسى كەلە جاتىر. قازاقستان تاراپىنىڭ ايتۋلى دودانى وتكىزۋدە دايىندىعى قالاي؟

- اتالعان دەڭگەيدەگى ءتۋرنيردى وتكىزۋ - قازاقستاننىڭ ۇستەل تەننيسى فەدەراتسياسى ءۇشىن ۇلكەن جەتىستىك. قازاقستان تەك قانا سپورتشىلارىمەن عانا ەمەس، ءىرى حالىقارالىق سايىستاردى وتكىزۋگە قاۋقارلى سپورتتىق دەرجاۆا رەتىندە تانىلعان مەملەكەت. تاۋەلسىزدىك العالى بەرى ءبىزدىڭ ەلدە ءارتۇرلى سپورت تۇرلەرى بويىنشا الەمدىك دەڭگەيدەگى سايىستار ۇيىمداستىرىلعان.

ەندىگى كەزەكتە ۇستەل تەننيسىنىڭ الەمدىك كارتاسىندا استانا دا ويىپ تۇرىپ ورىن الادى. قازاقستاننىڭ ۇستەل تەننيسى فەدەراتسياسىنا ۇلكەن جاۋاپكەرشىلىك ارتىلىپ وتىرعانىن ۇمىتپاعان ابزال. ءبىز مۇنى وتە جاقسى ءتۇسىنىپ وتىرمىز. فەدەراتسيا ءتۋرنيردى وتكىزۋ بويىنشا وتە اۋقىمدى جۇمىستاردى اتقاردى. گراند فينالدىڭ ءساتتى ناتيجەسىنە ۇمىتتەنە وتىرىپ، بۇل شارا حالىقارالىق ب ا ق- تا كەڭىنەن جاريالانار دەگەن سەنىمدەمىز. سونىمەن قاتار، قازاقستاندىق شەبەرلەر ءۇشىن بۇل الەمدىك دەڭگەيدەگى سپورتشىلاردان ءتالىم الۋعا كەرەمەت مۇمكىندىك بولىپ وتىر.

- بىرنەشە جىل بويى قازاقستاندىق سپورتشىلار الەمدىك دارەجەدەگى ۇستەل تەننيسىنىڭ ساڭلاقتارىمەن جۇزبە-ءجۇز كورىسىپ، ويىنىن تاماشالاۋعا مۇمكىندىك الدى. ال اتالعان سپورت ءتۇرىنىڭ قازاقستاندا دامۋى قاي دەڭگەيدە؟

- ۇستەل تەننيسى الەمدەگى بۇقارالىق تۇرعىدان ەڭ اۋقىمدى ءارى قولجەتىمدى سپورت ءتۇرى. قازاقستاندا جۇيەلى تۇردە ۇستەل تەننيسىن ويناپ جۇرگەندەردىڭ سانى 150 مىڭ ادامعا جەتەدى. قازىرگى تاڭدا كاسىبي تۇردە 5 مىڭ سپورتشى ۇستەل تەننيسىن ويناسا، ولاردى 200 گە جۋىق جاتتىقتىرۋشى باپتاپ جاتىر.

بۇگىنگى تاڭدا ءبىز الەمدەگى ەڭ مىقتى دەگەن قىتاي نەمەسە جاپونيا سەكىلدى مىقتى مەملەكەتتەردىڭ جەتەكشى سپورتشىلارىمەن باسەكەگە تۇسەمىز دەپ ماقتانا المايمىز. ءبىراق، ءبىزدىڭ سپورتشىلاردىڭ ۇزدىكتەرمەن يىق تىرەستىرىپ، تاجىريبە الۋ ارقىلى توپ جارۋعا تولىق مۇمكىندىگى بار.

- فەدەراتسيا مەن سپورتشىلار وزدەرىنىڭ الدىنا قانداي ماقسات قويىپ وتىر؟

- فەدەراتسيا الدىندا ەلىمىزدەگى بۇقارالىق سپورتتى دامىتۋ مىندەتى تۇر. ءبىز ەڭ الدىمەن بالالار مەن جاسوسپىرىمدەردىڭ جايىنا نازار اۋدارامىز. سەبەبى، بۇل سپورت وزگەلەردەي جاس بۋىندى سالاۋاتتى ءومىر سالتىن ساقتاۋعا شاقىرادى. بۇكىل وڭىرلەردە وسى سپورت ءتۇرىن دامىتۋ - نەگىزگى مىندەتتەردىڭ ءبىرى.

فەدەراتسيا قازىرگى تاڭدا قازاقستاننىڭ ۇستەل تەننيسى بويىنشا ۇلتتىق قۇراماسىن جاساقتاۋمەن اينالىسۋدا. جاتتىعۋ پروتسەسىن ۇيىمداستىرۋ باعىتىندا ۇلكەن جۇمىستار اتقارىلىپ كەلەدى. ۇلتتىق قۇراماعا قاراعاندىلىق بەلگىلى جاتتىقتىرۋشى ە. اليەۆا جەتەكشىلىك ەتەتىن بولدى. ءبىز سپورتشىلاردى شەبەرلىگىن شىڭداپ، ەڭبەكپەن بىرگە باسەكەگە قابىلەتتى دەڭگەيگە كوتەرىلۋگە شاقىرامىز. فەدەراتسيا جۇيەلى تۇردە جۇمىستى جۇرگىزەتىن بولسا الىنبايتىن اسۋ جوق. كادرلىق قامتۋ تۇرعىسىنان قۇرامانى وڭىرلەردىڭ سپورتشىلارى تولىقتىرىپ جاتىر.

- ءسىز ءوز سوزىڭىزدە وڭىرلەردە اتالعان سپورت ءتۇرىن دامىتۋعا باسا دەن قويىلىپ وتىرعانىن اتاپ ءوتتىڭىز. بۇل باعىتتا ناقتى قانداي جۇمىستار جۇرگىزىلىپ جاتىر؟

- كۇندەلىكتى تارتىپتە سپورتتى دامىتۋعا باسا ماڭىز بەرىپ وتىرمىز. بارلىق وڭىرلەردە ۇستەل تەننيسىمەن اينالىسۋعا بولاتىنداي جايلى جاعداي جاسالۋى ءتيىس. بيىلعى جىلى فەدەراتسيا وبلىستىق فيليالدارداعى جاتتىعۋ زالدارىنىڭ حال-احۋالىن تەكسەرىپ قايتتى. وندا فەدەراتسيا ەڭ الدىمەن قۇرىلعىلاردىڭ جاڭارۋىنا دەن قويدى. سوندىقتان، ءبىز 100 كاسىبي ۇستەل مەن 500 ءبولۋشى تور ساتىپ الىپ، تاراتىپ بەردىك. قۇرامانىڭ نەگىزگى جاتتىعۋ بازاسى بولۋمەن بىرگە، رەسپۋبليكالىق بۇقارالىق شارالاردى وتكىزەتىن الماتىداعى سپورت زالدا كۇردەلى جوندەۋ جۇمىستارى جۇرگىزىلدى.

قۇرىلعىلار جاڭارتىلعاننان كەيىن بالالار ءۇيى مەن مەكتەپ- ينتەرناتتارىنىڭ بالالارى اراسىندا «پينگ-پونگ حانشايىمى» اتتى ۇستەل تەننيسىنەن رەسپۋبليكالىق سايىس ۇيىمداستىرىلدى. وعان ەلىمىزدىڭ بارلىق وڭىرلەرىنەن 60 وقۋشى قاتىستى. سونىمەن قاتار، ءبىز كاسىبي جاتتىقتىرۋشى كادرلاردىڭ بولۋىنا ەرەكشە نازار اۋدارامىز. فەدەراتسيا قازىرگى تاڭدا جاتتىقتىرۋشىلاردىڭ بىلىكتىلىگىن ارتتىرۋ مىندەتىن وزىنە الىپ وتىر.

بۇل - ءبىزدىڭ ءبىرىنشى قادام. 14- جەلتوقسان كۇنى استانا الەمدىك ۇستەل تەننيسىنىڭ ورتالىعىنا اينالادى. سول سەبەپتى، استانالىقتار مەن بارلىق مەيمانداردى وسىناۋ ايتۋلى شاراعا شاقىرعىم كەلەدى. ءبىزدىڭ سپورتشى ك. گەراسيمەنكو ءۇشىن جانكۇيەر بولايىق.

- كەز كەلگەن سپورتتىڭ دامۋى ادامنىڭ كوپتەپ كەلۋىنە بايلانىستى تانىمال بولادى. ەل ىشىندە ۇستەل تەننيسىن تانىمال ەتە ءتۇسۋ بويىنشا سويلەسسەك. بۇل جۇمىستى قالاي شەشۋگە بولادى دەپ ويلايسىز؟

- ۇستەل تەننيسى - قىمبات ەكيپيروۆكانى قاجەت ەتپەيتىن الەمدەگى ەڭ قولجەتىمدى سپورت تۇرلەرىنىڭ ءبىرى. اتالعان سپورتتى تانىمال ەتە تۇسە وتىرىپ، ءبىز دەنساۋلىعى مىقتى ۇلتتى قالىپتاستىرامىز، سالاۋاتتى ءومىر سالتىن ناسيحاتتايمىز. استانادا گراند فينالدىڭ ءوتۋى قازاقستانداعى ۇستەل تەننيسىن دامىتۋعا ۇلكەن سەرپىن بەرەتىنىنە سەنىمىم كامىل.

پئكئر قالدئرؤ


قازاقپارات