قازاقستانداعى نەگىزگى تۋريستىك نىسان تۇرلەرى

08.12.2017 00:09

 استانا. قازاقپارات - قازاقستاننىڭ كەڭ بايتاق جەرىنىڭ تابيعاتى سان الۋان بولۋىنا وراي ونداعى تۋريستىك رەسۋرستار دا ءتۇرلى بولىپ كەلەدى.

 مىسالى، تابيعي- كليماتتىق، تاريحي، الەۋمەتتىك- مادەني، ساۋىقتىرۋ نىساندارى، رۋحاني، ادەبي، سونداي- اق، وزگە دە تۇردەگى نىساندار بار. ءبىراق، قازاقستانداعى تۋريستىك نىساندار نەگىزگى 3 توپقا بولىنەدى:

 تابيعي- ساۋىقتاندىرۋ نىساندارى، تاريحي- ارحەولوگيالىق نىساندار، ءتاۋىپ ەتۋ ورىندارى. تابيعي- ساۋىقتاندىرۋ نىساندارىنا سولتۇستىك قازاقستان ايماعىنداعى كوكشەتاۋ، بۋراباي، باياناۋىل، ەرەيمەنتاۋ، شىعىس قازاقستان اۋماعىنداعى زايسان، مارقاكول، التاي بوكتەرى، وڭتۇستىك قازاقستان جەرىندەگى باتىس تيان- شان، سولتۇستىك تيان- شان، التىنەمەل تاۋلارى، جەتىسۋ الابى، باتىس قازاقستانداعى ءۇستىرت، مۇعالجار، كاسپي ويىسى، جايىق ءوڭىرى، ورتالىق قازاقستانداعى قارقارالى، قىزىلاراي، بەكتاۋاتا، ۇلىتاۋ جانە تاعى دا باسقا تابيعي نىساندار جاتادى. بۇل تيپتەگى تۋريستىك نىساندارعا ىلە- الاتاۋى ۇلتتىق ساياباعى، تۇرگەن- شامالعان وزەندەرى ارالىعىنداعى شاتقالدار، تۇرگەن، ەسىك، تالعار، الماتى، قاسكەلەڭ، شامالعان ەلدى مەكەندەرى سەكىلدى الماتى وبلىسىنداعى ۇلتتىق ساياباقتار مەن قورىقتار دا ەنەدى. التىنەمەل، كوكشەتاۋ، بۋراباي سىندى رەكرەاتسيالىق تيپتەگى ۇلتتىق ساياباقتارىندا دا تۋريزمدى دامىتۋ مەملەكەت تاراپىنان قولداۋ تاۋىپ وتىر. وسى سەكىلدى قازاقستان اۋماعىنداعى 9 مەملەكەتتىك قورىقتا عىلىمي- ەكولوگيالىق تۋريزمدى دامىتۋدىڭ العى شارتتارى قالىپتاسقان. تاريحي- ارحەولوگيالىق ەسكەرتكىشتەردىڭ تانىمدىق ساپارلارداعى الار ورنى ەرەكشە.



 ارحەولوگيالىق ەسكەرتكىشتەردىڭ كەز كەلگەن نىساندارى تۋريستىك- ەكسكۋرسيا جۇمىستارىندا ماڭىزدى بولىپ كەلەدى. سونىڭ ىشىندە جەتىسۋداعى ساق قورعاندارى، تالحيز قالاشىعى، وڭتۇستىك قازاقستانداعى وتىرار، سايرام، باتىس قازاقستانداعى سارايشىق سىندى كونە قالالاردىڭ ورىندارىنا تۋريستەردىڭ قىزىعۋشىلىعى قاشان دا جوعارى. ارحەولوگيالىق- تاريحي ەسكەرتكىشتەردىڭ قازىرگە دەيىن جەتكەن نىساندارىنىڭ ىشىندە قورعاندار مەن مازارلار تۋريستەر سۇرانىسىنا يە. مىسالى، قولا ءداۋىر ەسكەرتكىشتەرىنە جاتاتىن جارتاستاعى پەتروگليفتەردى اتاۋعا بولادى. سونداي- اق، اڭىراقاي تاۋىنىڭ تاڭبالى سايىنداعى، كوكسۋ وزەنىندەگى ەشكىولمەس عيباداتحاناسى مەن شولاق، كىندىكتاس، بايانجۇرەك تاۋلارىنداعى تاستاعى سۋرەتتەر جاتادى.



 ءبىزدىڭ داۋىرىمىزگە دەيىنگى VI- III عاسىرلاردان قالعان ساق قورعاندارى، بەسشاتىر قورىمىنداعى جەرلەۋ كامەراسى جانە ساق اسكەرى كيىمىن كيگەن «التىن ادام» ، 2001-2002 -جىلدارى شىعىس قازاقستان وبلىسى قاتونقاراعاي اۋدانىنىڭ بەرەل قورعانىندا تابىلعان «ساق پاتشايىمى» ارحەولوگيالىق تۋريستىك نىساندارعا جاتادى. ورتاعاسىرلىق تۇركىستان، وتىرار، تۇرباي، قۇلان، مەركە، تالحيز، جاركەنت قالالارى سىندى ەلدى مەكەندەر دە قازىرگى تاريحي- تۋريستىك نىساندار رەتىندە ەسەپتەلەدى. تۇركىستان كونە قالاسى دا قازاق حاندىعىنىڭ العاشقى استاناسى رەتىندە قازاق ەلىنە قىزىعۋشىلىق تانىتاتىن كەز كەلگەن تۋريستىڭ كورگىسى كەلەتىن العاشقى نىسانى. ونداعى قوجا احمەت ياسساۋي كەسەنەسى، كەسەنە ءىشى مەن اينالاسىنا قازاق مەملەكەتىنىڭ نەگىزىن قالاعان تاۋكە، تاۋەكەل، جاڭگىر، ەسىم، ابىلاي، قازىبەك بي تابىتتارى كوپشىلىك نازارىن اۋدارادى. قازاقستاندا وتىرار، سارايشىق، سايرام تاعى دا باسقا ورتاعاسىرلىق كونە قالالار تۋريستەر ءۇشىن تارتىمدى نىساندار.



 قازاقستانداعى تۋريستىك نىسانداردىڭ ءۇشىنشى تۇرىنە جاتاتىن ءتاۋىپ ەتۋ، ياعني، ءدىني تۋريزم نىساندارى رەسپۋبليكا اۋماعىندا كوپتەپ كەزدەسەدى. ولارعا تۇركى الەمىندەگى قاسيەتتى تۇركىستان قالاسى، قوجا احمەت ياسساۋي كەسەنەسى، اباب- اراب مەشىتى، گاۋھار- انا زيراتى، ءالي- قوجا بەيىتى جاتادى. ادامدار بۇل قاسيەتتى جەرلەرگە ءتاۋىپ ەتىپ، تاڭىرگە سىيىنۋ ءۇشىن بارادى. ولاردىڭ قاتارىنا ارىستان باب كەسەنەسى، يبراھيم اتا بەيىتى، قاراشاش انا كەسەنەسى، تۇرابا اۋدانىنداعى ىسمايىل- اتا مازارى، جامبىل وبلىسىنداعى ايشا ءبيبى كەسەنەسى مەن قاراحان كەسەنەسى، قىزىلوردا وبلىسىنداعى ارتىق، ايتمان كەسەنەلەرى، بالقاش كولى ماڭىنداعى تەكتاۋ اتا، اۋەز باقسى جانە باسقا دا كيەلى ورىندار جاتادى. قازاق حالقىنىڭ ازاتتىق ءۇشىن كۇرەسى جولىنداعى باتىرلارعا، قولباسشىلارعا دەگەن قۇرمەتى مەموريالدار مەن ەسكەرتكىشتەردە كورسەتىلەدى. بۇلارعا رايىمبەك پەن قاراساي باتىر ەسكەرتكىشتەرى، قوردايداعى وتەگەن باتىر، اقتوبەدەگى ەسەت باتىر، سولتۇستىك قازاقستانداعى اعىنتاي مەن قاراساي ەسكەرتكىشتەرى، استاناداعى قاراكەرەي قابانباي ەسكەرتكىشتەرى، تاعى باسقالارى جاتادى. ورداباسى مەن اڭىراقاي ساعاسىنىڭ جازىعى، ۇلىتاۋداعى ءۇش ءجۇزدىڭ باسىن قوسقان جەر، تاريحي ورىندار رەتىندە جوشى جانە الاشا حان كەسەنەلەرى، الماتىداعى تاۋەلسىزدىك مونۋمەنتى، استاناداعى ءۇش بي ەسكەرتكىشتەرى قاستەرلى ورىندار ساناتىندا تۋريستىك نىساندارعا قوسىلادى.

 قازاق تاريحىنداعى قۇندى مادەني ەسكەرتكىشتەر قاتارىنا: قوزى كورپەش - بايان سۇلۋ، ەڭلىك- كەبەك كەسەنەلەرى، شوقان ءۋاليحانوۆ، قاجىمۇقان مۇڭايتپاس ۇلى مەموريالدارى، سۇلتان بەيبارىس، قۇرمانعازى جانە دينا نۇرپەيىسوۆا، اباي، ابىلايحان، ءاليا مەن مانشۇك، امانگەلدى يمانوۆ، ءىلياس جانسۇگىروۆ، ساكەن سەيفۋللين، مۇحتار اۋەزوۆ، تاعى باسقا كوپتەگەن ەستەلىك ورىندار جاتادى. جالپى، قازاقستان ءتۋريزمى ءۇشىن تابيعي- رەكرەاتسيالىق، تاريحي- ارحەولوگيالىق، ءتاۋىپ ەتۋ ورىندارى سىندى 3 ءتۇرلى تۋريستىك نىسانداردىڭ ءارقايسىسىنىڭ ماڭىزى زور. بۇل قۇندى قازىنانى ساقتاۋمەن قاتار، ادامزاتقا تانىستىرۋ دا - ۇلى مىندەت.

 

Massaget.kz

پئكئر قالدئرؤ


قازاقپارات