مەيىرىمدى استانا: ەلوردالىقتار بوراندا ءبىر-بىرىنە قالاي كومەكتەستى؟

13.01.2018 15:34

استانا. قازاقپارات - بەيسەنبى كۇنى اق تۇتەك بوران استانالىقتاردى ابىگەرگە ءتۇسىردى.  قالادا تابيعي سيپاتتاعى توتەنشە جاعداي جاريالاندى.

قالا اكىمى اسەت يسەكەشەۆ استانالىقتار مەن قالا قوناقتارىنا ۇيدەن شىقپاۋعا كەڭەس بەردى. قازاقپارات بوران قۇرساۋىندا قالعان تۇرعىندارعا قول ۇشىن سوزعان استانالىقتاردىڭ جۇرەك جىلىتار امالدارى تۋرالى ايتۋدى ءجون كوردى.

بوران كۇشەيگەن ساتتە الەۋمەتتىك جەلى مەن ب ا ق- تا مەكتەپكە شىققان بالانىڭ جوعالىپ كەتكەنى تۋرالى اقپارات تارادى. كەيىنىرەك، استاناداعى 78№ ورتا مەكتەپتىڭ ەكىنشى سىنىپ وقۋشىسى رۋسلاندى «كاماز» جۇرگىزۋشىسى مارات كوبەسوۆتىڭ ۇيىنە الىپ كەتكەنى بەلگىلى بولدى.

Мейірімді Астана: Елордалықтар боранда бір-біріне қалай көмектесті

قازاقپارات ءتىلشىسى مارات كوبەسوۆپەن حابارلاسىپ، وقيعانىڭ ءمان-جايىن سۇراستىردى:

«كەشە شامامەن تاڭعى 5:30 دا تۇنگى اۋىسىمنان كەلە جاتقاندا، قار قۇرساۋىندا قالدىم. جولىم بولىپ، قار تازالاۋشى كەلدى جانە «كاماز» - دى اۋپىرىمدەپ شىعاردىق. سول ساتتە كوشەدە جىلاپ كەلە جاتقان بالانى كوردىم. شامامەن التى جارىمنىڭ كەزى. قايدا بارا جاتقانىن سۇرادىم. «مەكتەپكە» دەپ جاۋاپ بەردى. مەكتەبىنە اپارسام، جابىق. سودان كەيىن ۇيگە اكەلىپ، ىستىق ءشاي بەردىم»، - دەيدى جۇرگىزۋشى.

مارات كوبەسوۆ تاڭعى 7:30 دا بالانى مەكتەپكە اپارعىسى كەلگەن، ءبىراق بوران باستالىپ كەتكەن. اتا-اناسىنا حابارلاسايىن دەسە، بالانىڭ ۇيالى تەلەفونى بولماعان.

«بالانى ۇيىنە اپارىپ تاستايمىن دەپ ۋادە بەردىم، ءبىراق كەزەكشىلىكتەن كەيىن كوزىم ءىلىنىپ كەتتى. 1-2 ساعاتتان سوڭ، ءتىسىم اۋىرىپ، ءدارىحاناعا شىقتىم. سوندا الدىمنان شىققان ايەل 78№ مەكتەپكە باراتىن جولدى سۇرادى. جوعالىپ كەتكەن بالانى ىزدەپ جۇرگەنىن ايتتى. مەن ءمان-جايدى ءتۇسىندىرىپ، ايەلدى ۇيگە اكەلدىم. كەيىنىرەك الەۋمەتتىك جەلىدەن اتا-اناسىنىڭ ءنومىرىن ىزدەپ تاپتىق»، - دەيدى مارات كوبەسوۆ.

بوران سالدارىنان ەلوردادا ءتۇرلى جازاتايىم وقيعالار تىركەلدى. سول سەبەپتى، سارىارقا اۋدانىنىڭ اكىمى ارمان تۇرلىبەك الەۋمەتتىك جەلىدە تۇرعىنداردى ءبىر-بىرىنە كومەكتەسۋگە شاقىردى.

«قۇرمەتتى تۇرعىندار! قولايسىز اۋا رايى كەزىندە ءبىر-بىرىمىزگە قايىرىمدى بولايىق، كومەكتەسەيىك. اق تۇتەك بوراننان جولدا جۇرە الماي تۇرعانداردى، ماشيناسى ومبى قارعا باتىپ قالعانداردى كورسەڭىزدەر توقتاپ، كومەكتەسىڭىزدەر، كەڭ پەيىل بولايىق»، - دەپ جازدى ول Facebook-تەگى ەكى قىزدى بوران ۇشىرىپ كەتە جازداعان ءساتتىڭ ۆيدەوسىنا پىكىر ءبىلدىرىپ.

«ابدەن اشۋعا بۋلىعىپ وتىرمىن. ەكى ەر ادام ماشينادا ۆيدەوعا ءتۇسىرىپ وتىر، شىعىپ كومەك بەرۋدى ءتىپتى ويىنا دا المايدى. ەرىنبەگەندەر ۆيدەوعا ءان جازعانىن قاراڭىزدارشى»، - دەدى ارمان تۇرلىبەك.

كۇنى بويى الەۋمەتتىك جەلى قولدانۋشىلارى جولدا قيىن جاعدايعا تاپ بولعاندار تۋرالى حابارلاپ وتىردى. اتاپ ايتقاندا، 20 ۇيىمنان قۇرالعان اۆتوجۇرگىزۋشىلەر كلۋبتارىنىڭ اليانسى الەۋمەتتىك بەلسەندىلىك تانىتتى. استانالىق جامبىل سۇراعانوۆ Facebook-تەگى ءوز پاراقشاسىندا اليانس مۇشەلەرىنىڭ 16 كولىكتى جانە 26 ادامدى قار قۇرساۋىنان شىعارعانىن جازدى.

«ق ر ت ج كوميتەتى مەن پوليتسيا كۇشەيتىلگەن رەجىمدە جۇمىس ىستەدى. ءبىراق، كەي جەردە ۇلگەرمەي قالۋى دا مۇمكىن. بۇل جاعدايدا ءبىز كومەككە كەلەمىز. تراسساعا شىعىپ، كومەككە مۇقتاج جانداردىڭ بار-جوعىن تەكسەرەمىز. كەشە كولىگىن جول بويىنا تاستاپ، قالاعا جاياۋ ءجۇرىپ كەتكەن ادامداردى كوپ كەزىكتىردىك. ولاردى جىلىتىپ، ىستىق ءشاي بەردىك جانە ۇيلەرىنە دەيىن جەتكىزىپ سالدىق»، - دەپ جاۋاپ بەردى جامبىل سۇراعانوۆ قازاقپارات تىلشىسىنە.


Мейірімді Астана: Елордалықтар боранда бір-біріне қалай көмектесті

وزگە كلۋبتار مەن قالا تۇرعىندارى بوراندى كۇنى ءوز كومەكتەرىن ۇسىندى. ءتىپتى، قاردان شىعا الماعان جاندارعا كومەكتەسۋ ءۇشىن كوكشەتاۋدان كەلىپ جەتكەندەر دە بار.

اتاپ وتەرلىگى، اۋا رايىنىڭ قولايسىزدىعىنا قاراماستان، بەيسەنبى كۇنى استانادا ءورت سوندىرۋشىلەر، پوليتسيا، جەدەل جاردەم، ت ج دەپارتامەنتى قىزمەتكەرلەرى، مەديتسينالىق مەكەمەلەر جانە كوممۋنالدىق قىزمەت ءوز جۇمىستارىن جالعاستىردى. استانالىق پوليتسيا قاراعاندى تاسجولىنان قابانباي باتىر داڭعىلىنا دەيىنگى اينالما جولدا 50 اۆتوكولىكتى قاردان شىعاردى.

جۇما كۇنى استانانىڭ اۋا رايى جاقساردى جانە تابيعي سيپاتتاعى توتەنشە جاعداي الىندى.

اۆتور: ايجان سەرىكجان قىزى

پئكئر قالدئرؤ


قازاقپارات