قىزىلوردادا ءبي فەستيۆالى ءوتتى

13.01.2018 15:58

قىزىلوردا. قازاقپارات - قىزىلوردادا وبلىستىق قازاقستان حالقى اسسامبلەياسىنىڭ ۇيىمداستىرۋىمەن العاش رەت ءبي فەستيۆالى ءوتتى، دەپ حابارلادى قازاقپارات ءتىلشىسى.

«ءبي نۇرى» اتتى فەستيۆالعا ەتنومادەني بىرلەستىكتەردىڭ، ورتا ءبىلىم بەرۋ ۇيىمدارىنىڭ حورەوگرافيالىق ۇجىمدارى، قالالىق بالالار جانە جاس وسپىرىمدەر ءبي انسامبلدەرى، بارلىعى 16 ۇجىم قاتىستى.

فەستيۆالدىڭ ماقساتى جاستاردىڭ بويىندا شىعارماشىلىققا دەگەن تالپىنىستى ارتتىرۋ، حورەوگرافيا ونەرىنىڭ كەڭ اۋقىمدا دامۋىنا اتسالىسۋ، وسكەلەڭ ۇرپاققا ەلىمىزدىڭ باستى بايلىعى - قازاقستان حالقىنىڭ دوستىعى مەن بىرلىگىن دارىپتەۋ. سونداي-اق ءبي ونەرى ارقىلى ەتنوسارالىق تولەرانتتىلىق جانە قوعامدىق كەلىسىمنىڭ قازاقستاندىق ۇلگىسىن ناسيحاتتاۋ بولىپ تابىلادى.

شارا ەكى كەزەڭنەن تۇردى. حالىق ءبيى جانە ەركىن تاقىرىپتاعى ءبي قويىلىمى. وعان 9-13 جانە 14-18 جاس ارالىعىنداعى بالالار قاتىستى. قازىلار القاسى ءبي ۇجىمدارىن ورىنداۋشىلىق شەبەرلىكتەرى، شىعارمالارىنىڭ كومپوزيتسيالىق قۇرىلىمى مەن ساحنالىق قيمىلى، كيىم ۇلگىسى بويىنشا باعالادى.

ناتيجەسىندە 9-13 جاس ارالىعىنداعى بالالار اراسىندا باس جۇلدەنى «بالبۇلاق» حالىقتىق ءبي ءانسامبلى، ءبىرىنشى ورىندى «جاسمين» تاتار ەتنومادەني بىرلەستىگى، 140№ ورتا مەكتەپتىڭ «اي-ارۋ» ءبي توبى جانە «كەرەمەت» بالالار تەاترى جەڭىپ الدى.

ال 14-18 جاس ارالىعىنداعى بالالار اراسىندا باس جۇلدەنى نازاربايەۆ زياتكەرلىك مەكتەپ وقۋشىلارىنان قۇرالعان «سامعا» ءبي توبى، ءبىرىنشى ورىندى «ريەۆەرانس» جەكە ءبي توبى مەن نازاربايەۆ زياتكەرلىك مەكتەبىنىڭ «نۇر- ءبي» ءبي توبى قانجىعاسىنا بايلادى. سونىمەن بىرگە، ەكىنشى جانە ءۇشىنشى ورىندار بەرىلدى.

جەڭىمپازدار ديپلومدارمەن، العىس حاتتارمەن جانە باعالى سىيلىقتارمەن ماراپاتتالدى.

اۆتور: ەلۋباي اۋەزوۆ

پئكئر قالدئرؤ


قازاقپارات