وليمپيادادا مەدال العان ەلدەر: كىم نەشىنشى ورىن

14.02.2018 07:05

پحەنچحان. قازاقپارات - وڭتۇستىك كورەيانىڭ پحەنچحان قالاسىندا ءوتىپ جاتقان وليمپيادا ويىندارىندا قازاقستان قۇراماسى ءبىر قولا مەدالمەن جالپى ەسەپتە 19- ورىندا كەلەدى، دەپ حابارلايدى قازاقپارات ءتىلشىسى.

بۇگىن پحەنچحان وليمپياداسىندا مەدال العان ەلدەر سانى 19 عا جەتتى. قازاق ەلى ازىرگە فريستايلشى يۋليا گالىشەۆا جەڭىپ العان جالعىز قولا مەدالمەن سوڭعى ورىندى تۇيىندەپ تۇر.

ءدال قازىرگى كورسەتكىش بويىنشا، جالپى ەسەپتە گەرمانيا قۇراماسى كوش باستاپ كەلەدى. ولاردىڭ ەنشىسىندە 5 التىن، 2 كۇمىس، 2 قولا مەدال بار. ەكىنشى ورىندا - نيدەرلاندى ەلىنىڭ سپورتشىلارى. ولاردىڭ قورجىنىندا 4 التىن، 4 كۇمىس، 2 قولا مەدال بولسا، ۇزدىك ۇشتىكتى نورۆەگيا كومانداسى 3 التىن، 5 كۇمىس، 3 قولا مەدالمەن تۇيىندەدى.

سونىمەن قاتار، ءتورتىنشى ورىندا 3 التىن، 4 كۇمىس، 3 قولا مەدالمەن كانادا قۇراماسى تۇرسا، ۇزدىك بەستىكتەن 3 التىن، 1 كۇمىس، 2 قولا مەدالمەن ا ق ش ەلىنىڭ سپورتشىلارى كورىندى.

ايتا كەتەيىك، وليپيادا ويىندارىنا قازاقستاننان 46 سپورتشى 57 جولدامامەن 9 سپورت تۇرىنەن باق سىناپ جاتىر. ال جالپى پحەنچحاندا سپورتتىڭ 15 تۇرىنەن 102 مەدال جيىنتىعىن ساراپقا سالادى. جارىس 25 -اقپاندا ءوز مارەسىنە جەتەدى.

كۇنسۇلتان وتارباي

پئكئر قالدئرؤ


قازاقپارات