قازاقستانعا العاش كەلگەندە جوڭعار بولدىم، ەندى قازاق بولعىم كەلەدى - مارك داكاسكوس

14.02.2018 07:20

وسكەمەن. قازاقپارات - گولليۆۋد جۇلدىزدارىنان قۇرالعان توپ شىعىس قازاقستان تۋرالى دەرەكتى فيلم تۇسىرەتىن بولدى.

ول فيلم الەمدىك تەلەارنالارعا ارنالماق، دەپ حابارلايدى قازاقپارات ءتىلشىسى.

وتكەن عاسىردىڭ سوڭىندا اتاعى الەمگە جايىلعان بىرنەشە گولليۆۋد جۇلدىزى اۋەلى وسكەمەن قالاسىنداعى مادەني نىسانداردى ارالاپ، «نۇرتاۋ» دەمالىس بازاسىنا بارادى. ودان كەيىن مارقاكولدى كوزبەن كورىپ، كاتونقاراعاي اۋدانىنداعى راحمان قاينارىنا ات باسىن تىرەمەك. بەرەلدەگى پاتشالار جازىعى، جيدەبايداعى اباي-شاكارىم مەموريالدى كەشەنى، قوڭىر اۋليە ۇڭگىرى مەن ىرعىزباي مازارى دا گولليۆۋد جۇلدىزدارىنىڭ نازارىنا ۇسىنىلماق. ءتۇسىرىلىم توبىن قابىلداعان وبلىس اكىمى دانيال احمەتوۆ امەريكالىق اكتەرلەرگە التايدىڭ ايازى قايتقان كەزدە كەلگەندەرىن ايتتى.

«شىعىس قازاقستان - ەلدىڭ يندۋستريالدى ورتالىعى. ءبىز بەريللي مەن تانتال ءونىمىنىڭ الەم بويىنشا 25-30 پايىزىن وندىرەمىز. سىزدەر اۋا رايى اياز قايتىپ، كۇن جىلىنعان كەزدە كەلدىڭىزدەر. بىزدە تاۋ دا، وزەن- كول دە، نۋ ورمان دا، ءشول دە بار. سىزدەر شىعىس قازاقستاننىڭ ءتورت ايماعىندا بولاسىزدار. كوپ ۇلتتى ەلىمىزدىڭ باي سالت-داستۇرىمەن تانىساسىزدار» - دەدى دانيال احمەتوۆ.

ءوز كەزەگىندە امەريكالىق اكتەرلەر قازاقستاننان العان العاشقى اسەرلەرىمەن ءبولىستى. ال قازاقتىڭ كينو ونەرىمەن ءبىرشاما تانىس مارك داكاسكوس وسىمەن ءۇشىنشى قازاقستاندىق جوباعا قاتىسىپ وتىرعانىن جەتكىزدى.

«قازاقستانعا العاش كەلگەندە جوڭعار بولدىم. ەندى قازاق بولعىم كەلەدى. مەن بۇل جەردىڭ تابيعاتىنا تامسانامىن. بۇل ەلدىڭ اسحاناسى دا ەرەكشە. قانشا تاماق ىشسەڭ دە، سالماق قوسپاي، قاز-قالپىندا جۇرە بەرەسىڭ» - دەدى مارك داكاسكوس.

گولليۆۋدتىق دەلەگاتسيا كۋرچاتوۆ پەن ريددەردە دە بولىپ، ءوڭىردىڭ وندىرىستىك الەۋەتىمەن تانىسادى. ش ق و اكىمى باسپا ءسوز قىزمەتىنىڭ حابارلاۋىنشا، بۇل جوبا دۇنيەجۇزىندە قازاقستاندىق برەندتى قالىپتاستىرۋعا باعىتتالعان.

  null

پئكئر قالدئرؤ


قازاقپارات