استانادا مۇمكىندىگى شەكتەۋلى جاندارعا قولداۋ كورسەتەتىن ورتالىق اشىلدى

17.04.2018 08:53

استانا. قازاقپارات - ورتالىقتىڭ سالتاناتتى اشىلۋىنا ق ر ەڭبەك جانە حالىقتى الەۋمەتتىك قورعاۋ ۆيتسە-ءمينيسترى سۆەتلانا جاقىپوۆا قاتىسىپ، مۇنداي ورتالىق مۇمكىندىگى شەكتەۋلى جاندار ءۇشىن اسا پايدالى ەكەنىن اتاپ ءوتتى، دەپ حابارلايدى قازاقپارات.

ق ر ەڭبەك جانە حالىقتى الەۋمەتتىك قورعاۋ مينيسترلىگىنىڭ باسپا ءسوز قىزمەتىنىڭ مالىمەتىنشە، ينكليۋزيۆتى جوبالاۋ ورتالىعى «ELAMAN» الەۋمەتتىك يننوۆاتسيالىق جوبالار قوعامدىق قورىنىڭ» ءتوراعاسى مەن قوعام بەلسەندىسى الماس ەرجاننىڭ باستاماسىمەن قۇرىلعان.

«بارلىق قۇقىق قورعالاردا قاندايدا ءبىر كەمسىتۋدىڭ ەلەمەنتتەرى بولماۋى ءتيىس. مەنىڭ ويىمشا، ورتالىق جاڭا يدەيالار مەن كوزقاراستاردى قالىپتاستىراتىن تاعى ءبىر ورىنعا اينالادى»، - دەدى سۆەتلانا جاقىپوۆا.

ءوز كەزەگىندە، ءىس-شارانىڭ اشىلۋ سالتاناتىندا الماس ەرجان ورتالىقتىڭ الدىندا اتقارىلاتىن ۇلكەن مىندەتتەر تۇرعانىن اتاپ ءوتتى.

«ءبىز كوماندا جينادىق، كەڭسەنى جالعا الىپ، مۇگەدەكتەردىڭ قاجەتتىلىكتەرىن قاناعاتتاندىرۋ ءۇشىن ونى جوندەۋدەن وتكىزدىك. بۇل ۇزاق مەرزىمدى جوبا جانە بىزدە كوپتەگەن جوسپارلار بار. اتاپ ايتقاندا، ساپارشىلاردى دايارلايتىن كۋرستار ۇيىمداستىرامىز، قولجەتىمدى ورتاداعى ۆولونتەرلەردى دايىندايمىز، الەۋمەتتىك كاسىپكەرلىككە قاتىسقىسى كەلەتىندەرگە تاجىريبەدەن وتۋدە مۇمكىندىگى شەكتەۋلى جاندار ءۇشىن تەگىن زاڭگەرلىك كەڭەستەر بەرەمىز»، - دەدى الماس ەرجان.

اتالعان ورتالىق مەملەكەتتىك ورگاندار جانە كومپانيالارمەن بىرىگە وتىرىپ، ءارتۇرلى ساناتتاعى مۇگەدەكتەردى پسيحولوگيالىق دايارلاۋ جانە اقپاراتپەن قامتاماسىز ەتۋ، سونداي-اق جۇمىسپەن قامتۋ جانە الەۋمەتتىك بەيىمدەۋ ماقساتىندا كەشەندى سۇيەمەلدەۋ قىزمەتتەرىن جۇرگىزەدى.

پئكئر قالدئرؤ


قازاقپارات