قازاقستان حالقىنىڭ سانى 18,2 ميلليوننان استى

14.06.2018 09:22

استانا. قازاقپارات - 2018-جىلدىڭ 1- مامىرىنداعى جاعداي بويىنشا، قازاقستاندا حالىق سانى 18 ميلليون 232 ادامدى قۇرادى.

بۇل 2017-جىلدىڭ سايكەس كەزەڭىمەن سالىستىرعاندا 238,5 مىڭ ادامعا نەمەسە 1,3 پروتسەنتكە كوپ، دەپ حابارلايدى قازاقپارات ءتىلشىسى ق ر ۇ ە م ستاتيستيكا كوميتەتىنە سىلتەمە جاساپ.

اتاپ ايتقاندا، ونىڭ ىشىندە قالا تۇرعىندارىنىڭ سانى 10 ميلليون 492,2 مىڭ ادامدى نەمەسە جالپى حالىقتىڭ 57,5 پروتسەنتىن قۇراسا، اۋىلدىق جەردە تۇراتىن ادامدار سانى 7 ميلليون 739,8 مىڭ ادامعا جەتتى. بۇل، ەل حالقىنىڭ 42,5 پروتسەنتى.

بيىل قاڭتار-ءساۋىر ارالىعىندا رەسپۋبليكادا 1 جاسقا دەيىنگى 1095 ءسابي شەتىنەگەن (بىلتىر - 1054). بۇل، بىلتىرعىدان 3,9 پروتسەنتكە كوپ. 2018-جىلدىڭ ءتورت ايىندا سابيلەردىڭ شەتىنەۋى جاڭا تۋعان 1000 نارەستەگە (8,68) شاققاندا 8,81 جاعدايدى قۇراپ وتىر.

2018-جىلدىڭ قاڭتار-ساۋىرىندە 2017-جىلدىڭ وسى كەزەڭىمەن سالىستىرعاندا قازاقستانعا كەلۋشىلەر سانى 25,1 پروتسەنتكە ازايىپ، قازاقستاننان كەتكەن ادامدار سانى 20,8 پروتسەنتكە ارتقان. نەگىزگى ميگراتسيالىق الماسۋ ت م د ەلدەرىمەن بولىپ وتىر. ت م د ەلدەرىنە كەلگەندەر مەن كەتكەندەردىڭ سانى سايكەسىنشە 77,3 جانە 88,8 پروتسەنتتى قۇرايدى.

ەل ىشىندە كوشىپ-قونۋشىلار سانى 24,9 پروتسەنتكە ازايدى. ءوڭىرارالىق كوشىپ-قونۋدىڭ وڭ كورىنىسى ەلدىڭ ءتورت وڭىرىنە - الماتى (12013 ادام) جانە استانا (3699 ادام)، ماڭعىستاۋ (48 ادام) جانە اقمولا (39 ادام) وبلىستارىنا تيەسىلى.

پئكئر قالدئرؤ


قازاقپارات