بۇگىن رەسەيدە فۋتبولدان 21- الەم چەمپيوناتىنىڭ اشىلۋى وتەدى

14.06.2018 09:33

استانا. قازاقپارات - بۇل، 14- ماۋسىم كۇنى رەسەي فەدەراتسياسىندا فۋتبولدان 21- الەم چەمپيوناتىنىڭ رەسمي اشىلۋى وتەدى. «Qazaqstan» تەلەارناسى شارانى تىكەلەي ەفيردەن كورسەتەدى، دەپ حابارلايدى قازاقپارات ءتىلشىسى.

چەمپيوناتتىڭ اشىلۋ سالتاناتى ماسكەۋدەگى «لۋجنيكي» ستاديونىندا وتەدى. وعان FIFA پرەزيدەنتى دجانني ينفانتينو، رەسەي باسشىسى ۆلاديمير پۋتين، قازاقستان پرەزيدەنتى نۇرسۇلتان نازاربايەۆ پەن وزگە دە بىرنەشە مەملەكەتتىڭ باسشىلارى قاتىساتىنى كۇتىلۋدە.

الەمدىك كىل مىقتى كوماندالاردىڭ كەزدەسۋى 14- ماۋسىم - 15- شىلدە ارالىعىندا رەسەيدىڭ 11 قالاسىندا وتەدى، اتاپ ايتقاندا، ماسكەۋ، سانكت- پەتەربۋرگ، قازان، سوچي، ۆولگوگراد، ەكاتەرينبۋرگ، كالينينگراد، نيجنيي نوۆگورود، روستوۆ- نا- دونۋ، سامارا جانە سارانسك. چەمپيوناتقا الەمنىڭ 32 ۇزدىك ۇلتتىق قۇرامالارى قاتىسادى.

ايتا كەتەيىك، رەسەي ءوز تاريحىندا تۇڭعىش رەت الەم چەمپيوناتىن ۇيىمداستىرۋ مۇمكىندىگىنە يە بولدى.

FIFA- نىڭ قارجىلىق قۇجاتتارىنا سۇيەنىپ The New York Times حابارلاعانداي، ر ف- دا وتەتىن الەم چەمپيوناتى حالىقارالىق فۋتبول فەدەراتسياسىنا 6,1 ميلليارد دوللار پايدا اكەلەتىن بولادى.

FIFA برازيليادا وتكەن الەم چەمپيوناتىندا  4,8 ميلليارد دوللار تابىس تاپقان بولاتىن. بۇل ر ف- داعى ويىنداردان 1,3 ميللياردقا از. 2010 -جىلعى وڭتۇستىك افريكا رەسپۋبليكاسىنداعى چەمپيونات - 3,9 ميلليارد دوللار، 2006 -جىلعى گەرمانياداعى چەمپيونات 1,9 ميلليارد دوللار تابىس اكەلدى.

بۇعان دەيىن حابارلاعانىمىزداي، قازاقستاندىقتار FIFA- 2018 ويىندارىنىڭ اشىلۋ سالتاناتى (استانا ۋاقىتىمەن 20.30) مەن چەمپيوناتتىڭ رەسەي مەن ساۋد ارابياسى اراسىنداعى (استانا ۋاقىتىمەن 21.00) العاشقى ماتچىن «قازاقستان» تەلەارناسىنان تىكەلەي كورە الادى. ال استانا تۇرعىندارى مەن قوناقتارى ءۇشىن ونى اشىق اسپان استىندا - «قازمەديا» ورتالىعىنىڭ ۇلكەن ەكرانىنان تاماشالاۋ مۇمكىندىگى بار.

الەمدىك دودا اياسىندا وتەتىن 60-تان استام ماتچتى «قازاقستان» مەن «Qazaqstan» ارنالارى تۇگەلدەي تىكەلەي ەفيردەن كورسەتەتىن بولادى. ايتا كەتەرلىگى، فۋتبولدان الەم چەمپيوناتىنىڭ 1/8 فينالى 30 - ماۋسىم كۇنى، ال قازاقستاندىقتار استانا كۇنىن تويلاپ جاتاتىن 6 - شىلدە كۇنى - شيرەك فينال باستالادى. جارتىلاي فينال 10-شى جانە 11- شىلدە كۇندەرى، فينال 15 - شىلدە كۇنى وتەدى.

اۆتور: ميرا تولەندى قىزى

پئكئر قالدئرؤ


قازاقپارات