اقشا، پاتەر مەن جۇمىس: ءمينيستردىڭ قابىلداۋىنا كىرگەن ادامدار نە سۇرايدى

10.08.2018 20:47

استانا. قازاقپارات - بۇگىن ق ر ەڭبەك جانە حالىقتى الەۋمەتتىك قورعاۋ ءمينيسترى ءمادينا ءابىلقاسىموۆا ءۇش جارىم ساعات بويى حالىقتى قابىلدادى. اتالعان شارا «نۇر وتان» پارتياسىنىڭ ۇيىمداستىرۋىمەن ءوتتى، دەپ حابارلايدى قازاقپارات ءتىلشىسى.

قوعامدىق قابىلداۋعا كەلگەن ادامدار سان الۋان ماسەلەلەردى كوتەردى. بىرەۋلەر زەينەتاقىنى قايتا ەسەپتەۋدى سۇراسا، ەندى بىرەۋلەر مۇگەدەكتەردىڭ جاعدايىن جەتكىزدى. «قازمۇنايگاز» ۇلتتىق كومپانياسىنان زاڭسىز شىعارىلعان ءبىر توپ ازاماتتار دا كەلىپ كەتتى. بۇدان بولەك، جەكە ماسەلەلەردى شەشۋدى سۇراعاندار بولدى. پاتەر، جۇمىس ءتىپتى اقشا سۇراعاندار بولدى. مينيستر ءاربىر ادامنىڭ ماسەلەسىن جەكە- جەكە قاراپ، كومەك بەرۋگە ۋادە ەتتى. قوعامدىق ماڭىزى بار ماسەلەلەردى كوتەرگەن ازاماتتار دا جازىلدى. ماسەلەن، II توپتاعى مۇگەدەك جۇماتاي شۇيتەنوۆ ساناتورلىق ەمدەۋ ماشاقاتىن جەتكىزدى. ونىڭ ايتۋىنشا، بۇگىندە استانا قالالىق جۇمىسپەن قامتۋ باسقارماسى ءبىر عانا جەرگە جولداما بەرەدى. ول - قوتىركول.

«سول جەرگە بارساق، سۋ جوق، ۆانناعا دا تۇسە المايسىن. كولگە تۇسۋگە بولمايدى. توسەك ورىندارى ەسكى. ءبارى سوعىستان قالعان زاتتار سياقتى. باسقا جەرگە جىبەرمەيدى. سەبەبى باسقا وبلىستاردىڭ ساناتورلىق- كۋرورتتىق ورىندارىن تەندەرگە قاتىستىرمايدى. مويىلدى بار، وقجەتپەس بار. استانادا تۇرامىز، ءبىراق تەك قوتىركولگە عانا جىبەرەدى. ارىز ايتساق، باسقاسىمەن كەلىسىمشارت جوق دەيدى. سويتسەك، قوتىركول ەمدەۋ ورنى اكىمدىككە قارايدى. نەگىزى، بيىل ءبىر مۇگەدەككە  145000 تەڭگە ءبولىنىپ وتىر. مەن ول اقشاعا مويىلدىعا، يا بولماسا، سارىاعاشقا بارا الامىن عوي. باعاسى دا تومەن. جوق، قوتىركولگە باراسىن دەيدى. ونى قالاي تۇسىنۋگە بولادى؟ » ، - دەيدى ج. شۇيتەنوۆ.

مينيستر م. ءابىلقاسىموۆا اتالعان ماسەلەنى جەكە باقىلاۋىنا الدى.

«مەن اكىمدىك باسشىلىعىمەن سويلەسەمىن. بۇل ماسەلەنى شەشۋ كەرەك. باسقا وبلىستاردا مۇگەدەكتەرگە تاڭداۋ جاساۋعا مۇمكىندىك بەرەدى. ال استانادا ءبىر عانا ساناتوريي. ولاي بولمايدى» ، - دەپ اتاپ كورسەتتى م. ءابىلقاسىموۆا.

ءمينيستردىڭ سوزىنە قاراعاندا، بۇگىنگى قابىلداۋ كەزىندە ءبىراز ماسەلەلەر كوتەرىلدى. ءبىراق كەيبىر پروبلەمالار مينيسترلىكتىڭ قۇزىرەتىنە جاتپايدى.

«ەندى، حالىقتىڭ باسىم بولىگى الەۋمەتتىك كومەكتى تاعايىنداۋ جايىندا سۇرايدى. قوسىمشا جەڭىلدىكتەردى سۇرايتىندار دا بار. مەديتسينالىق- الەۋمەتتىك ساراپتامانىڭ جۇمىس ساپاسىن سىنايدى. قازىر وسى سالادا ءبىراز وزگەرىستەر قولعا الىندى. الداعى ۋاقىتتا ادامداردى قاعازباستى جۇمىستان قۇتىلادى دا، مۇگەدەكتىكتى ەشبىر قيىندىقسىز الاتىن بولادى. سوسىن جۇمىسقا تۇرعىزۋ ماسەلەسىمەن كەلەتىندەر از ەمەس. ءبىز بارلىق ارىز- شاعىمداردى باقىلاۋعا الىپ وتىرامىز. باسپانا سۇرايدى. وكىنىشكە قاراي، اتالعان ماسەلە جەرگىلىكتى اتقارۋشى ورگانداردىڭ قۇزىرەتىنە جاتادى» ، - دەدى م. ءابىلقاسىموۆا قازاقپارات تىلشىسىنە بەرگەن سۇحباتىندا.

پئكئر قالدئرؤ


قازاقپارات