ەلباسى قازاقستان-رەسەي ءوڭىرارالىق فورۋمىنا قاتىسۋ ءۇشىن پەتروپاۆلعا كەلدى

09.11.2018 11:57

پەتروپاۆل. قازاقپارات - ق ر پرەزيدەنتى نۇرسۇلتان نازاربايەۆ قازاقستان مەن رەسەيدىڭ ءوڭىرارالىق ىنتىماقتاستىعىنىڭ XV فورۋمىنا قاتىسۋ ءۇشىن پەتروپاۆل قالاسىنا كەلدى، دەپ حابارلايدى قازاقپارات ءتىلشىسى.

بەلگىلى بولعانداي، ەلباسى شاھارداعى جاڭا وقۋشىلار سارايى مەن كيروۆ اتىنداعى زاۋىتتىڭ جۇمىسىمەن تانىسادى.

سولتۇستىك قازاقستان وبلىسىنا ر ف پرەزيدەنتى ۆلاديمير پۋتين باستاعان دەلەگاتسيا دا ساپارلايتىنى كۇتىلۋدە. مەملەكەت باسشىلارى الدىمەن فورۋم قارساڭىندا اشىلعان «قازاقستان مەن رەسەيدەگى تۋريزمدى دامىتۋدىڭ جاڭا جولدارى مەن ۇردىستەرى» اتتى كورمەمەن تانىسۋعا بارادى.

سونىمەن قاتار، ق ر پرەزيدەنتى نۇرسۇلتان نازاربايەۆ پەن ر ف باسشىسى ۆلاديمير پۋتيننىڭ قاتىسۋىمەن وتەتىن پلەنارلىق وتىرىستا ەكى ەلدىڭ تۋريزمىن دامىتۋ ماسەلەلەرى تالقىلانباق.

فورۋم اياسىندا قازاقستان مەن رەسەيدىڭ ۆەدومستۆو وكىلدەرى، وبلىس باسشىلارى تۋريستىك سالانىڭ الەۋەتى جونىندە تانىستىرىلىمدار وتكىزەدى. وسىدان كەيىن قول جەتكىزىلگەن ۋاعدالاستىقتار بويىنشا ەكىجاقتى ءبىرقاتار قۇجاتتارعا قول قويىلاتىنى جوسپارلانعان.

بۇدان بۇرىن حابارلانعانداي، سولتۇستىك قازاقستان وبلىسىندا «قازاقستان مەن رەسەيدەگى ءتۋريزمدى دامىتۋدىڭ جاڭا تاسىلدەرى مەن تەندەنتسيالارى» اتتى تۋريستىك كورمە ءوز جۇمىسىن باستادى.

كورمەگە قازاقستاننىڭ بارلىق وڭىرلەرى، ءتورت ۇيىم، ءتورت تۋروپەراتور، ءبىر ۇلتتىق كومپانيا قاتىسىپ جاتىر. مۇنىمەن قوسا، رەسەيدىڭ 11 ايماعى، 3 تۋروپەراتورى وزدەرىنىڭ ونىمدەرى مەن تۋريستىك نىساندارىن تانىستىرۋدا. شارا بارىسىندا ءبىرقاتار كوممەرتسيالىق قۇجاتتارعا قول قويىلدى. كورمەگە قازاقستان مەن رەسەيدەن 200 گە جۋىق جۋرناليست كەلدى.

پئكئر قالدئرؤ


قازاقپارات