كەلەسى جىلى ينفورماتيكا ءپانى 1-سىنىپتان وقىتىلادى - مينيسترلىك

09.11.2018 13:04

استانا. قازاقپارات - 2019 -جىلدان باستاپ ينفورماتيكا ءپانى 1-سىنىپتان وقىتىلادى. بۇل تۋرالى بۇگىن ق ر پارلامەنتى سەناتىنداعى ۇكىمەت ساعاتىندا ءبىلىم جانە عىلىم ۆيتسە- ءمينيسترى ەلميرا سۋحانبەرديەۆا ايتتى، دەپ حابارلايدى قازاقپارات ءتىلشىسى.

«2017-2019 -جىلدارى بارلىق مەكتەپتى كەڭ جولاقتى ينتەرنەتكە تەگىن قوسۋعا قارجى قاراستىرىلعان. بۇل رەتتە كەيبىر وڭىرلەردە مەكتەپتەردىڭ كابەلدىك ينتەرنەتكە قوسىلماۋىنا بايلانىستى 2017 -جىلى 2756 مەكتەپ، 2018 -جىلى 460 مەكتەپ سپۋتنيك بايلانىسى ارقىلى ينتەرنەتپەن قامتاماسىز ەتىلدى. ءبىلىم بەرۋدى سيفرلاندىرۋ اياسىندا مەكتەپتەردىڭ 95 پايىزى ينتەرنەتكە قوسىلاتىن بولادى»، - دەدى ول.

 ونىڭ سوزىنە قاراعاندا، وقۋشىلار سارايلارى مەن 3 مىڭ مەكتەپتە روبوتوتەحنيكا بويىنشا ەلەكتيۆتى كۋرستار ەنگىزىلدى. روبوتوتەحنيكا كابينەتتەرىن جابدىقتاۋ بويىنشا شارالار قابىلدانىپ جاتىر.

«بيىل ينفورماتيكا ءپانى 3-سىنىپتان باستالدى. «سيفرلىق قازاقستان» باعدارلاماسى اياسىندا ينفورماتيكا ساباعى كەلەسى جىلدان باستاپ 1-سىنىپتان وقىتىلادى. ولاردىڭ باعدارلاماسى دايىندالىپ جاتىر. سونىمەن قاتار بارلىق وڭىردە 21 ІТ- ليتسەي اشىلدى»، - دەدى ەلميرا سۋحانبەرديەۆا.

ەسكە سالايىق، استانادا وتكەن «Digital Bridge» حالىقارالىق يننوۆاتسيالىق فورۋمىندا ق ر پرەمەر- ءمينيسترى باقىتجان ساعىنتايەۆ ينفورماتيكا ءپانى 1-سىنىپتان باستاپ وقىتىلۋى مۇمكىندىگىن ايتقان بولاتىن.

اۆتور: مارلان جيەمباي

پئكئر قالدئرؤ


قازاقپارات