قازاقستاندا 2018-جىلى ونەركاسىپ ءوندىرىسى 4,1 پايىزعا ءوستى

12.01.2019 10:53

استانا. قازاقپارات - قازاقستاندا 2018-جىلدىڭ قاڭتارى مەن جەلتوقسانى ارالىعىندا ونەركاسىپ ءوندىرىسىنىڭ كولەمى 4,1 پايىزدىق ءوسىمدى كورسەتتى، دەپ حابارلايدى قازاقپارات ءتىلشىسى ق ر ۇلتتىق ەكونوميكا مينيسترلىگى ستاتيستيكا كوميتەتىنە سىلتەمە جاساپ.

2018-جىلعى كورسەتكىش بويىنشا 2017-جىلمەن سالىستىرعاندا شيكى مۇناي، تابيعي گاز جانە مەتال كەندەرىنىڭ ءوندىرىسى ۇلعايعان. تاماق ونىمدەرى، تەمەكى بۇيىمدارى، مۇناي وڭدەۋ مەن حيميالىق ونەركاسىپ ونىمدەرى، رەزەڭكە جانە پلاستماسسا بۇيىمدارىنىڭ ءوندىرىسى، مەتاللۋرگيا ونەركاسىبى جانە كولىك جاساۋ ونىمدەرى ءوندىرىسىنىڭ كولەمى وسكەن.

ال قارا مەتاللۋرگيا ونىمدەرىنىڭ ءوندىرىسى تومەندەگەن.

اتاپ ايتقاندا، ەسەپ بەرىلىپ وتىرعان كەزەڭدە گاز كوندەنساتىن قوسا العاندا مۇناي ءوندىرۋ كولەمى 90,4 ميلليون توننانى (2017-جىلمەن سالىستىرعاندا 4,8 پايىزعا ارتقان)، مىس كەنىنىڭ ءوندىرىسى - 103,2 ميلليون توننانى (8,6+ پايىزعا) قۇراعان. بەنزين ءوندىرىسى 4 ميلليون توننا (29,8+ پايىز)، گاز ءوندىرىسى 4,7 ميلليون توننالىق (7,4+ پايىز) دەيگەيگە جەتكەن.

ال جازىق بولات ءوندىرىسىنىڭ كولەمى 2,5 ميلليون تونناعا جەتسە (-10,5 پايىز)، تازارتىلعان مىس - 0,4 ميلليون توننانى (2,8+ پايىز)، پورتلاندتسەمەنت 9,9 ميلليون توننا (5,5+ پايىز)، ەلەكتر قۋاتى - 107,1 ميلليارد كۆت/ساع (+ 3,8 پايىز) جانە ۇن - 4 ميلليون توننانى (0,7+ پايىز) كورسەتكەن. ونەركاسىپتىك ونىمدەردىڭ ءوندىرىس كولەمىنىڭ ءوسۋى رەسپۋبليكانىڭ 14 وڭىرىندە بايقالىپ وتىر.

پئكئر قالدئرؤ


قازاقپارات